गुढीपाडव्याच्या आधीच सोन्याच्या दरात विक्रमी वाढ – जळगावमध्ये प्रतितोळा ९२,५०० रुपये..
24 प्राईम न्यूज 30 मार्च 2025
जळगाव : साडेतीन मुहूर्तापैकी एक असलेल्या गुढीपाडव्याच्या मुहूर्तावर सोने खरेदी करण्याची परंपरा आहे. मात्र, गुढीपाडव्याच्या एक दिवस आधीच म्हणजेच शनिवार, २९ मार्च रोजी सोन्याच्या दरात मोठी वाढ झाली आहे. जळगावच्या बाजारपेठेत सोन्याचे दर प्रतितोळा तब्बल ९२,५०० रुपयांवर पोहोचले आहेत, जे विक्रमी दर मानले जात आहेत.
अमेरिकेचे माजी राष्ट्राध्यक्ष डोनाल्ड ट्रम्प यांनी जाहीर केलेल्या आर्थिक धोरणांचा जागतिक अर्थव्यवस्थेवर परिणाम होत असून, गुंतवणूकदारांनी आपली गुंतवणूक सोन्यात वळवल्याने मागणी वाढली आहे. परिणामी, सोन्याच्या किमतीत झपाट्याने वाढ होत आहे. गेल्या २४ तासांत सोन्याच्या दरात तब्बल १,२०० रुपयांची वाढ झाली आहे.
शनिवारी सोन्याचे दर ८९,५०० रुपये होते, मात्र जीएसटीसह हे दर ९२,५०० रुपयांवर गेले आहेत. गुढीपाडव्याच्या दिवशी सोन्याचे दर अजून वाढणार का, याकडे नागरिकांचे लक्ष लागले आहे.
